A Forza das Minorías

Porque dun xeito ou doutro todos formamos parte dunha inmensa minoría. Promocionar, escribir ou ilustrar libros para nenos/as e mozos/as. Publicalos dende unha lingua ou cultura afastada dos códigos maioritarios. Lelos en situacións de precariedade económica ou con dificultades fisico-psíquicas que impidan o acceso en igualdade á cultura. Ter que ser neno e adulto ao mesmo tempo en sociedades que non respectan os dereitos fundamentais da infancia. Verse obrigado a emigrar e empezar de novo nunha lingua ou cultura que non é a propia. Non ter país de seu. Sentir en minoría. Falar en minoría. Amar en minoría. Ler en minoría. Velaquí o lema, o sentido e o tema xeral do noso congreso. Unha cuestión, a da situación das minorías, que leva preocupado a IBBY desde hai anos. Desa preocupación naceu o Centro IBBY dos Libros Infantís e Xuvenís para Nenos con Discapacidades, de Oslo, e nacerá o Centro IBBY das Literaturas Infantís e Xuvenís da Diversidade Cultural, de Santiago de Compostela.

O son do Pozo Bastón

E hoxe, despois de pasalo moi ben (fixemos o top 40 dos monstros galegos) cos rapaces de 4ª, 5ª e 6ª do CPI Eusebio Lorenzo Baleirón, de Dodro, fun visitar o Pozo Bastón, no río Te, en Araño.Ten unha lenda fermosísima que conta o fallido ritual de desencantamento das tres fillas dun mouro.

Alí están aínda mergulladas as tres irmás, e estarán ata que se lles acabe o encanto, polas malas mañas do desencantador.

Escoitade o runxido da fervenza do Pozo Bastón.

Mitos e monstros do imaxinario galego

O martes, 24 de marzo, pola mañá, vou estar en Dodro, no colexio Eusebio Lorenzo Baleirón para falar dos mitos e dos monstros do imaxinario de Galicia.
Que interese o tema xa me parece un trunfo. Xa vos contarei.

Bibliografía

Creación. Libros
A noite dos pesadelos
A escola de Briador
A raposa no galiñeiro
Antoloxía do conto de tradición oral
Bacoriño
Cando os animais falaban
Contos colorados
Contos de medo no museo
Contos de ogras, aventuras, baladas e piratas
Contos para levar no peto
Diccionario dos seres míticos galegos
Diccionario de los seres míticos gallegos
Memorias dun raposo
Narradio. 56 historias no ar
Ninguén está só
O galo avisado e o raposo trampulleiro
O polimacho e outras criaturas
Os dous irmáns e outros contos populares do Antigo Exipto
Palabra por palabra. Contos da policía
Pequena mitoloxía de Galicia
Resalgario

CABALO BULIGÁN. Contos da tradición oral de Galicia
Contos marabillosos, I, II, III, IV.
Contos de maxia, I, II, III, IV.
Contos de animais, I, II.
Máis contos de animais, I, II.
Contos fantásticos, I, II.
Contos de parvos e pillos, I, II.
Contos de encantamento, I, II,
Contos prodixiosos, I, II.

LENDAS DE GALICIA
1.-Arrepíos e outros medos
Historias galegas de fantasmas e de terror
2.-A flor da auga
Historias de encantos, mouros, serpes e cidades mergulladas

Investigación. Libros
Guía do Museo Provincial de Lugo
Manuel María
Polavila na Pontenova. Lendas contos e romances
Da fala dos brañegos. Literatura oral do concello de Abadín

ARTIGOS VARIOS
Ramón Verea, o inventor da primeira calculadora.
Poe, e nada máis.
O Porvir.

© 2006 Antonio Reigosa

O día despois

Hai que volver a empezar.
É coma unha maldición. Por unhas ou por outras sempre estamos nas mesmas: tropezar e caer, tropezar e caer...
A dereita goza de salvoconduto para cuestións éticas e morais. Xa lles supón esa apego á comenencia, xestionan moi ben a corruptela, amañan coma ninguén asuntos de favores e recomendacións... En cambio, a esquerda, para unha vez que chega a pisar as alfombras, colle rumbos imprevistos, desorienta a votantes e afíns, e para colmo, envalentona á dereitona máis rancia que se tira aos colexios electorais coma se crese na democracia.
Hai que volver a empezar, coma sempre; a ver se desta nos erguemos ata chegar á maioría de idade.

Gústanos ler

Os dous irmáns e outros contos populares do antigo Exipto

Os dous irmáns e outros contos populares do Antigo Exipto

Coas versións dos cinco contos que aquí ofrecemos pretendemos un achegamento ao imaxinario popular do Antigo Exipto. Todos eles teñen en común esa orixe de raigame popular. Son relatos de intriga e de aventura, de maxia e de persuasión, que tratan do fado ou do destino, de viaxes marabillosas protagonizados por xentes do común pero tamén por magos coma Senorisis, por heroes, por faraóns e deuses coma Anubis ou Osiris. Non faltan os obxectos máxicos, as plantas fabulosas, as transformacións e os encantamentos aglaiantes, o misterio, o enigma ou as situacións sorprendentes que en moitos casos semellan ser a orixe, o berce, de motivos semellantes aos que aparecen nos relatos populares que aínda hoxe se difunden de boca a orella no noso mundo occidental. Do Antigo Éxipto ata hoxe cóntanse moitos centos, e ata milleiros, de anos pero as almas dos exipcios de antano e as nosas siguen nutríndose con ese manxar exquisito que entón e agora chamamos fantasía.
Para os máis curiosos ofrécense ao final dos textos unhas notas sobre a orixe e a historia de cada un dos contos, así como un breve glosario con comentarios sobre os obxectos, os lugares ou os personaxes que os protagonizan.

Edicións Morgante, 2008 (ISBN: 978-84-936460-0-4)

Morreu Antonio Zavala

Fallece el académico de número de Euskaltzaindia Antonio Zavala

Noite Vella 2008

Noite do 31 de decembro de 2008

Lembrade que esta noite tamén é noite de bruxas e se unha, un casual, vos amordica, hai que devolverlle o belisco se non queredes quedar ameigadiños pra o ano.

Unha aperta grande coma a sorte que vos desexo para o 2009